RUBRIC SA KILOS-AWIT

Pamantayan	1	2	3	Sarili	Pangkat
Interpretasyon/Kilos	Hindi angkop ang interpretasyon o kilos batay sa awit/pyesang iniinterpret.	May katamtamang kawastuhan ang interpretasyon o kilos batay sa awit o pyesang iniinterpret.	Napakagaling ng interpretasyon o kilos batay sa awit o pyesang iniinterpret.
Koryograpi	Di magaling ang koryograpi. Hindi sabay-sabay at walang pagkakatugma ang mga kilos at galaw.	May katamtamang galling ang koryograpi. Naging sabay-sabay at may pagtutugma ang ilang bahagi ng kilos at galaw.	Napakagaling ng koryograpi. Naging sabay-sabay at may pagkakatugma ang kilos at galaw mula simula hanggang wakas.
Ekspresyon ng mukha at damdamin	Walang ekspresyon ng mukha at di binigyan ng angkop na damdamin ang kilos at galaw.	May tamang ekspresyon ng mukha at binigyan ng angkop na damdamin ang ilang bahagi ng kilos-awit.	Napakagaling ng ekspresyon ng mukha at may wastong damdamin ang kilos at galaw mula simula hanggang wakas.
Kasuotan at props na ginamit	Hindi angkop ang mga kasuotan at props na ginamit.	Hindi gaanong angkop ang kasuotan at props na ginamit.	Napakaganda at angkop na angkop ang kasuotan at props na ginamit.
Panghikayat sa madla	Nangangailangan pa ng kasanayan at walang kasanayang pangtanghalan.	Katamtamang may panghikayat sa madla at may kakayahang pantanghalan.	Napakagaling ng panghikayat sa madla at may kakayahang pantanghalan.
			Kabuuang Puntos

RUBRIC SA AKROSTIK

Pamantayan	1	2	3	Sarili	Pangkat
Salitang ginamit	Di-angkop ang mga salitang ginamit.	Angkop ang mga salitang ginamit.	Angkop na angkop ang mga salitang ginamit.
Kaugnayan ng pahayag sa paksa	Di-kaugnay ang mga pahayag na ginamit sa paksa.	Magkaugnay ang mga pahayag na ginamit sa paksa.	Magkaugnay na magkaugnay ang mga pahayg na ginamit sa paksa.
Pagsunod sa panuto	Di nakasunod sa panutong ibinigay.	Nakasunod sa ilang panutong ibinigay.	Nakasunod sa lahat ng panutong ibinigay.
Kawastuhan ng mga salitang ginamit	Di wasto ang salitang ginamit	Wasto ang ilang mga salitang ginamit.	Wastong-wasto ang lahat ng ginamit na salita.
Kalinisan at kaayusan ng pagkakagawa o pagkakasulat	Di gaanong malinis at maayos ang pagkakagawa at pagkakasulat.	Malinis at maayos ang pagkakagawa at pagkakasulat.	Napakalinis at napakaayos ng pagkakagawa at pagkakasulat.
			Kabuuang Puntos

RUBRIC SA GINAWANG ISLOGAN/POSTER

MGA KRAYTERYA	4	3	2	1	Sarili	Pangkat
Pagkamalikhain	Lubos na nagpamalas ng pagkamalikhain sa paghahanda.	Naging malikhain sa paghahanda.	Hindi gaanong naging malikhain sa paghahanda.	Walang ipinamalas na pagkamalikhain sa paghahanda.
Pamamahala ng Oras	Ginamit ang sapat na oras sa paggawa ng sariling disenyo sa gawain.	Ginamit ang oras na itinakda sa paggawa at naibigay sa tamang oras.	Naisumite dahil binantayan ng guro	Hindi handa at hindi tapos.
Presentasyon	Lubhang naging malinaw ang pagbigkas at paghahatid ng mensahe.	Naging malinaw ang pagbigkas at paghahatid ng mensahe.	Hindi gaanong malinaw ang pagbigkas at paghahatid ng mensahe.	Hindi naging malinaw ang pagbigkas/paghahatid ng mensahe.
Organisasyon	Buo ang kaisipan konsistent, kumpleto ang detalye at napalinaw.	May kaishan at may sapat na detalye at malinaw na intension.	Konsistent, may kaisahan, kulang sa detalye at hindi gaanong malinaw ang intension	Hindi ganap ang pagkakabuo, kulang ang detalye at di-malinaw ang intensyon
Kaangkupan sa Paksa	Angkop na angkop ang mga salita (islogan) at larawan sa paksa.	Angkop ang mga salita o islogan sa larawan ng paksa.	Hindi gaanong angkop ang mga salita at larawan sa paksa	Hindi angkop ang mga salita at larawan sa paksa.
				Kabuuang Puntos

Level ng Pagsasagawa (Performance)

RUBRIC SA PAGTATANGHAL NG DULA

Krayterya	Lubhang Kahika-hikayat                                      3	Kahika-hikayat                                             2	Di-Gaanong Kahika-hikayat                   1	Sarili	Pangkat
Tinig	Angkop ang paghina at paglakas ng tinig ayon sa diwa at damdaming nakapaloob sa binasa	Pabagu-bago ang lakas at hina ng boses at katamtaman lamang ang pagpapadama ng damdamin	Di-gaanong naiparinig ang pagbabago ng lakas at hina ng tinig gayundin ang damdaming nakapaloob sa binasa.
Tindig	Akma ang bawat kilos at galaw	May ilang galaw at kilos na di-gaanong angkop.	Kulang ang kilos na ipinakita.
Bigkas	Malinaw ang bigkas. Napalutang nito ang damdaming namamayani rito	Malinaw ang bigkas bagamat may ilang bahagi ito na di-gaanong nabigkas	Di-gaanong malinaw ang pagbigkas sa mga salita.
Panghikayat Sa Madla	Taglay nito ang panghikayat sa madla at nakikinig dahil sa naging reaksyon ng tagapakinig	Taglay ang hikayat sa madla ngunit katamtaman lamang ang reaksyon ng madla	Hindi gaanong nahikayat ang mga nakikinig dahil walang gaanong reaksyong makikita sa kanila.
Kaangkupan ng paksa	Angkop na angkop ang napiling salita sa paksa.	Angkop ang ilang bahagi ng salita sa paksang tinalakay.	Hindi angkop ang napiling salita sa paksa.
			Kabuuang Puntos

IMPONG SELA (Maikling Kwento)

Noon ay buong kataimtimang minamalas ni Impong Sela ang kanyang lalabing-animing taong apong lalaki sa pagkakahigang walang katinag-tinag. Sa ilalim ng maputing kumot, ang kanyang apong nakatihaya ay matuwid na matuwid na katulad ng isang bangkay, walang kakilus-kilos maliban, marahil sa maminsan-minsang pagkibot ng mga labing nanunuyo at halos kasimputla na ng isperma. Maya-maya’y marahang dinama ng kanyang palad ang noo ng nahihimlay na maysakit. Sa gayong pagkakadantay, ang nakahiga ay napakislot na animo’y biglang nagulat ngunit hindi rin nabalino sa pagkakahimbing.

“Maria Santisima!” ang nahihintakutang bulong ni Impong Sela sa kanyang sarili samantalang iniaangat ang kanyang kamay mula sa pagkakadantay sa noo ng apo. “Nagbalik na naman ang kanyang lagnat.”

Ang matanda’y nakaramdam ng isang biglang bugso ng lungkot sa kanyang dibdib. Ang lagnat ng bata ay nawala na, dalawang araw na ang nakararaan, salamat sa kanyang santong kalagyo, ngunit ngayo’y…

Mahal na Ina ng Awa!

Ito’y kanyang ikinababalisa. Nalalaman niyang ang lagnat na nagbabalik ay lubhang mapanganib. Ano kaya kung ang kanyang apo, ang kanyang pinakamamahal na si Pepe’y… Maawaing langit!

Bakit, hindi ba siya ang maituturing na nagpalaki sa kanyang apong ito! Kauna-unahan niyang apong lalaki sa kanyang kaisa-isang anak na lalaki, sa katauhan ni Pepe ay ibinuhos ni Impong Sela ang lahat na ng pagmamahal at pag-aaruga ng isang impo. Hindi halos nalalaman ng mga magulang nito kung paano siya lumaki. Laki sa nuno ang tawag sa kanya. At tapat sa kasabihang iyon, si Pepe’y lumaki sa layaw, sa malabis na pagpapalayaw.

Siya ang naging dahilan ng malimit na pagkakagalit ni Conrado at ni Impong Sela. May mga pagkakataong ang anak at ang ina ay nagkakapalitan ng maiinit na sagutan, ngunit kailanman, palaging ang matanda ang nagtatagumpay. Hindi niya mapapayagang masaling man lamang ng ama ang kanyang si Pepe.

At saka ngayo’y…

Si Impong Sela’y nagsimulang mag-isip nang malalim. Kailangang si Pepe’y maligtas sa kuko ng kamatayan. Sa kanyang pagkalito ay pumasok sa diwa ang gunita ng mga santo, panata, debosyon…

A…!

“Mahal na Hesus Nazareno!” ang kanyang marahang bulong kasabay ang pagtitirik ng mga mata. “Para Mo nang awa! Iligtas Mo po ang aking apo at magsisimba kami ng siyam na Biyernes sa Quiapo. Huwag Mo Po siyang kunin.”

Natatandaan pa niyang ang panata ring yaon ang nagligtas sa kanyang anak na ama ni Pepe nang ito’y pitong taon pa lamang. Kahimanawari’y ito rin ang magligtas naman sa kanyang apo!

Maya-maya, ang maysakit ay kumilos. Dahan-dahang idinilat niya ang kanyang mga matang wari ay nananaginip at saka tumingin-tingin sa kanyang paligid. Hindi naglaon at namataan niya ang kaniyang impo sa kanyang tabi. Inilabas niya ang kanyang kamay sa kumot at saka iniabot ang kamay sa matanda.

“Lola,” ang mahinang tawag.

“Oy, ano iyon, iho?” ang tugon ni Impong Sela sabay pihit at yumukod nang bahagya upang mapakinggan niyang mabuti ang sasabihin ni Pepe.

“Nagugutom ako.”

“Ikukuha kita ng gatas.”

“Ayoko. Sawa na ako sa gatas.”

Ang matanda ay nag-atubili. Gatas, sabaw ng karne, katas ng dalandan, tsaa at wala na. Ang mga ito lamang ang maaaring ipakain sa kanya ayon sa bilin ng doctor.

“Ibig mo ng kaldo, anak?”

“Ayoko!”

“Katas ng dalandan?” Kangina lamang umaga’y itinulak niya at natapontuloy ang idinulot ng matanda. At si Pepe’y ayaw na ayaw ng tsaa, noon pa mang siya’y malakas.

“Lola, nagugutom ako!” Ang tinig ni Pepe’y may kahalo nang pagkainip.

“Sandali lang iho,” sabay tindig ng matanda at lumabas sa silid.

Pagkaraan ng ilang sandal, si Impong Sela’y nagbalik na taglay na sa kanyang kamay ang isang pinggan ng kaning sinabawan ng sinigang na karne at isang kutsara.

“Eto, anak, ngunit huwag kang kakain nang marami, hane?”

Pagkakita sa pagkain, si Pepe’y nagpilit na makaupo ngunit pabagsak na napahigang muli sa unan. Ang matanda’y nagmamadaling lumapit sa apong nanghihina.

“Huwag kang pabigla-bigla, iho,” aniya, samantalang inaayos ang mga unan sa tabi ng dingding. “O, dito ka sumandal.”

Sa tulong ng kanyang lola, si Pepe’y nakasandal din sa unan. At siya’y sinimulan nang pakainin ni Impong Sela. Isang kutsara. Dalawang kutsara. Tatlo. Apat. Katulad ng isang hayok na hayok sa gutom ay halos sakmalin ni Pepe ang bawat subo ng kanyang lola.

“Nanay! Ano ang …..” Si Conrado’y patakbong pumasok sa silid at tinangkang agawin mula kay Impong Sela ang pinggan ng kanin ngunit huli na! Ang pinggan ay halos wala nang laman.

“Nanay! Wala ba kayong isip?” ang sa pagkabigla ay naibulalas ni Conrado. “Hindi ba ninyo nalalaman ang bilin ng doktor na….

“Ow, hayaan mo ako!” ang madaling putol sa kanya ng matanda. “Nalalaman ko kung ano ang aking ginagawa. Paano lalakas ang bata kung papatayin ninyo sa gutom? Hindi siya mamatay sa kaunting kanin. Bayaan mo siyang mamatay na nakapikit ang mata at huwag nakadilat. Totoooooy! Neneeee!”

Ang dalawang maliliit na kapatid ni Pepe’y tumatakbong pumasok sa loob ng silid.

“Huwag kayong tatakbo! Hindi ba ninyo nalalamang may sakit ang inyong kapatid? O, kanin ninyo ito,” at idinulot ni Impong Sela sa mga bata ang natirang pagkain ni Pepe, “saying kung itatapon itong grasya ng Diyos.”

“Huwag!” ang halos naisigaw ni Conrado. “Inay, hindi ba ninyo nalalamang si Pepe’y may tipus?”

“E, ano ngayon? Ang mga bata ay mahahawa, hindi ba?” anang matanda sa tinig na naghahamon. “ Ang hirap sa inyo’y pinaniniwalaan ninyong lahat ang dala rito ng mga Amerikano. May korobyo kuno ang sakit ni Pepe na siyang makakakain ng mga bata. Tse! Bakit noong kapanahunan namin, walang pakulo-pakulo ng tubig, walang poso-artesyano, at nanggagaling lamang sa balon an gaming iniinom na kung minsan ay may liya pa. Tingnan mo ako. Gaano na ako katanda ngayon? Kung ang korobyong iyang pinagsasabi ninyo ay totoo, bakit hindi ako namatay? At kayong mga tubo sa panahong ito na masyadong delikado sa lahat ng bagay, ilan sa inyo ang umaabot sa edad namin? Kaululang lahat iyang pinagsasabi ninyo. Kung ibig ng Diyos na ikaw ay mamatay ay mamamatay ka, magpagamot ka man sa isang libong doktor. Sa kanya ka umasa at huwag sa kalokohan. Kanin ninyo ito,” ang baling sa mga apo, “at huwag kayong parang tuod sa pagkakatayo!”

Si Totoy at si Nene ay nag-atubili at tinapunan ng tingin ang kanilang amang pagkatapos ng mahabang “sermon” ng kanilang lola ay walang nagawa kundi ang magsawalang-kibo na lamang.

“Bakit, natatakot ba kayo?” ang tanong ni Impong Sela sa kanyang mga apo. Hinagisan pa man din ng isang irap ang kanyang mga anak, at saka hinugot ang tsinelas mula sa kanyang paa. “Tingnan natin kung sino ang masusunod sa bahay na ito! Kanin ninyo ito, kung hindi’y….”

Nanginginig na sumunod ang mga bata, samantalang ang kanilang ama’y tumatanaw na lamang sa labas ng durungawan.

Kinabukasan, si Pepe’y nahibang sa lagnat. Nagbalik ito sa matinding bugso na siyang hindi ikapalagay ng maysakit. Tila siya iniihaw, pabiling-biling sa hihigan, at nakalulunos kung humahalinghing. Sa mga mata ni Sinang na ang kanyang ina ay nalalarawan ang isang paghihirap ng kaloobang isang ina lamang ang maaaring makadama sa gayong mga sandal, samantalang minamalas niya ang kahambal-hambal na ayos ng kanyang anak. Naroon din si Impong Sela. “Masama ang kanyang lagay.”

Hindi nagkamali ang doktor. Sa loob ng sumunod na oras ay pabali-balikwas si Pepe sa higaan at naghihiyaw ng kung anu-anong ikinakakagat ng labi ng mga nakamamalas. Ang mga luha ni Sinang ay tila walang lagot na tanikala. Walang patid. Walang-tila. Ang mga ngipin ni Conrado’y nagtitiim. Samantalang si Impong Sela’y bumubulong ng walang katapusang mga panalangin.

“Sinang,” ang marahang tawag ng lalaki sa kanyang asawa, “huwag kang umiyak. Ang mabuti kaya’y dalhin natin siya sa ospital.”

“Ospital? At nang siya’y pabayaang mamatay roon? Hindi! Huwag ninyong madala-dala si Pepe ko sa ospital. Kung kayo’y nagsasawa nang mag-alaga sa kanya ay bayaan ninyo kaming maglola. Maaalagaan ko rin siyang mag-isa. Mabuti ka ngang ama! Noong ikaw ay maliit pa, sa tuwi kang magkakasakit ako ang nagtitiyaga sa iyo at hindi kita inihihiwalay sa aking mga paningin. Kung ito’y hindi mo magagawa sa sarili mong anak ngayon hayaan mo’t ako ang gagawa!”

“Ngunit, Nanay!” nasa tinig ni Conrado ang pagsusumamo at pagmamakaawa. “Ano an gating magagawa rito? Kulang tayo sa kagamitan. Samantalang sa ospital…”

“Samantalang sa ospital,”” kapag si Impong Sela’y nagsimulang manggagad, siya’y handing makipaglaban, “lalo na’t ikaw ay nasa walang bayad, ay titignan ka lamang nila kung kalian ka nila ibig tingnan. Ano ang kuwenta sa kanila ng isang maysakit na hindi naman nila kaanu-ano? Mamatay ka kung mamatay, ano ang halaga sa kanila niyon? Tingnan mo ang nangyari kay Kumareng Paula, isang araw lamang sa ospital at … Ave Maria Purisima! Huwag ninyong galawin ang apo ko! Hindi maaari!”

Sa mukha ni Conrado ay biglang sumulak ang dugo! Ibig niyang humiyaw ibig niyang maghimagsik, ibig niyang magtaklob na ang langit at lupa!

Ngunit mula sa kanyang nangangatal na mga labi ay walang namutawi kundi ang impit na “Diyos ko!!!” Sa gitna ng kanyang pagluha, ang mabait na si Sinang ay lumapit sa asawa at tinapunan iyon ng isang “hayaan-mo-naang-Nanay” na tingin. Kasabay ang isang malalim na buntunghininga si Conrado’y nalugmok sa isang likmuan. Ang salitaan ay napinid na.

Umagang-umaga kinabukasan, nagtaka na lamang sila’t natagpuan sila sa isang sulok si Impong Selang nanangis, umiiyak na nag-iisa. Siya’y hindi man lamang tinuluan ng luha ng si Pepe’y naghihirap at saka ngayon pang si Pepe’y matiwasay na, salamat sa suwerong tinusok sa kanya ng manggagamot ay saka…

“Bakit, Nanay?”” ang namamanghang tanong ni Conrado.

“Naiisip-isip ko,”ang kanyang hikbi, “ang anak na dalagita ni Juan ay kamamatay lamang noong isang linggo!”

“O, ay ano? Lalo naming namanghang tanong ng anak na hindi maiugpong ang pagkamatay ng anal ni Mang Juan sa mga luha ng kanyang ina.

“Iya’y totoo! Huwag mong pagtatawanan ang matatandang pamahiin. Marami na akong nakita. Iya’y hindi nagkakabula.”

“Pawang nagkataon lamang ang nakita ninyo. Huwag ninyong guluhin ang isip ninyo sa kaululang iyan.”

“Ang isa pa,” ang patuloy ng matandang hindi siya pinapansin,  “kagabi, ang mga manok ay nagputakan. Nang ang nasira mong ama ay namatay ay ganyan din ang nangyari noong huling gabi bago siya pumanaw. Kaawa-awa Pepe kooo!”

At…

Kataka-taka o hindi kataka-taka, ang luha ni Impong Sela ay nagpatuloy ng pagdaloy hanggang ang mga luntiang damo sa ibabaw ng puntod ng pinakamamahal niyang apo ay halos isang dangkal na ang angat sa lupa.